Japanese prefecture offers rewards for reporting illegal hiring of foreign workers

Maglulunsad ang lalawigan ng Ibaraki sa Japan ng isang programa sa Mayo na magbibigay ng gantimpalang salapi sa mga residente na mag-uulat ng mga kumpanyang kumukuha ng dayuhang manggagawa nang ilegal. Layunin ng hakbang na tugunan ang pinakamataas na antas ng ilegal na pagtatrabaho ng mga dayuhan sa bansa.

Ayon sa lokal na pamahalaan, ang pokus ay parusahan ang mga employer at broker na sangkot sa ilegal na pagkuha ng manggagawa, hindi ang mismong mga trabahador. Maaaring isumite ang mga ulat sa opisyal na website ng lalawigan, ngunit kinakailangang magbigay ng pagkakakilanlan at valid ID ang mga nagrereport upang maiwasan ang anonymous o mapanirang reklamo.

Iginiit ng mga awtoridad na tanging mga ulat na may sapat na basehan ang tatanggapin at tatanggihan ang mga reklamo na nakabatay sa diskriminasyon, hitsura, nasyonalidad, o simpleng isyu sa pamumuhay.

Kung ang ulat ay hahantong sa pagkakaaresto ng isang employer, maaaring makatanggap ang nagreport ng humigit-kumulang 10,000 yen o nasa $63. Ang Ibaraki ang kauna-unahang lalawigan sa Japan na magpapatupad ng ganitong sistema bukod sa umiiral na programa sa pambansang antas.

Ipinapakita ng opisyal na datos na noong 2025, mahigit 13,000 dayuhan ang nahuling ilegal na nagtatrabaho sa Japan, kung saan 3,518 kaso ang mula sa Ibaraki—ang pinakamataas sa bansa sa ikaapat na sunod na taon.

Gayunpaman, umani ng batikos ang programa mula sa mga grupong legal at ilang mamamayan. May mga nagsabing maaari itong magdulot ng diskriminasyon, paglabag sa karapatang pantao, at pagtaas ng xenophobia. Nanawagan din ang Ibaraki Bar Association na bawiin ang proyekto.

Pinabulaanan naman ni Gobernador Kazuhiko Oigawa ang mga kritisismo at iginiit na hindi target ng polisiya ang mga dayuhan, kundi ang mga kumpanyang nagsasamantala sa ilegal na paggawa.

Source / Larawan: Asahi Shimbun