PHILIPPINES: Labi ng Pinatay na OFW sa Kuwait, Dumating na sa Pilipinas
Dumating sa bansa ang mga labi ng napatay na overseas Filipino worker (OFW) na si Jullebee Ranara noong Biyernes ng gabi, Enero 27, inihayag ng Overseas Worker Welfare Administration (OWWA).
Si Ranara, 35, ang OFW na nadiskubreng nasunog sa disyerto ng Kuwait noong Enero 22. Batay sa autopsy report na natanggap ng Philippine Embassy sa Kuwait, buntis si Ranara nang mapatay ito.
Sinabi ni OWWA Administrator Arnel Ignacio na ang kanyang mga labi ay inilipad mula Kuwait papuntang Dubai pagkatapos ay connecting flight mula Dubai papuntang Maynila.
Blacklisted na sa Pilipinas ang mga amo ni Ranara, habang iniimbestigahan ang kanyang mga local at foreign recruitment agencies.
Samantala, tiniyak naman ni Department of Migrant Workers Secretary Susan Ople na mabibigyan ng hustisya ang mga napatay na OFW.
Mula noon ay nakipag-ugnayan na si Ople sa pamilya ni Ranara para magbigay ng kinakailangang suporta.
Nauna nang sinabi ng Department of Foreign Affairs na magpapadala sila ng abogado sa Kuwait para hawakan ang kaso ni Ranara.
Sumuko na sa Kuwaiti authority ang suspek sa pagpatay kay Ranara, ang 17-anyos na anak ng kanyang amo.
