Toyota to transfer luxury minivan production

Inanunsyo ng Toyota Body na ililipat nito ang produksyon ng mga luxury minivan na “Alphard” at “Vellfire” mula sa pabrika nito sa Inabe (lalawigan ng Mie) patungo sa planta ng Toyota sa Tahara (lalawigan ng Aichi) bago matapos ang taong 2027. Sa ganitong hakbang, magiging eksklusibong pabrika para sa mga komersyal na sasakyan ang planta sa Inabe, kabilang ang van na “Hiace” at isang bagong henerasyon ng mga komersyal na van na kasalukuyang dine-develop.

Samantala, ipagpapatuloy pa rin ang produksyon ng iba pang minivan para sa pasahero gaya ng “Noah” at “Voxy” sa pabrika ng Fujimatsu, na pinamamahalaan din ng Toyota Body. Plano rin ng kumpanya na pagandahin ang kalagayan ng paggawa at imprastrutura ng planta sa Inabe bilang paghahanda sa bagong yugto nito bilang tagagawa ng sasakyang pangkalakalan.

Bahagi ito ng mas malawak na estratehiya ng Toyota upang palakasin ang kumpetisyon sa merkado, kabilang ang pagsasama ng pabrika ng Hamura na dating pinamamahalaan ng Hino. Ang bagong platform para sa mga komersyal na sasakyan ay inaasahang sasagot sa iba’t ibang pangangailangan gaya ng kapasidad, uri ng pagmamaneho, at mga energy source.

Ang planta sa Tahara, na siyang gagawa ng Alphard, ay kasalukuyang gumagawa ng mga modelo ng Lexus tulad ng LS at NX, gayundin ng mga SUV tulad ng Land Cruiser 250 at 4Runner. Pinag-aaralan din ng planta ang posibilidad ng paggawa ng mga susunod na henerasyon ng electric vehicles gamit ang mga makabagong teknolohiya sa produksyon.

Source / Larawan: Nikkan Jidousha Shimbun