Nankai trough: Japan’s plan to reduce deaths in potential megaquake

Inanunsyo ng pamahalaang Hapones nitong Martes (ika-1 ng Hulyo) ang isang bagong pagsusuri sa pambansang plano sa pag-iwas sa sakuna, na naglalayong bawasan ng hanggang 80% ang bilang ng inaasahang nasawi sa isang posibleng megadilubyo sa Nankai Trough — isang rehiyong mataas ang panganib sa lindol na sumasaklaw mula kanluran hanggang gitnang bahagi ng bansa. Sa kasalukuyan, tinatayang aabot sa 298,000 katao ang maaaring mamatay sa pinakamasamang senaryo.

Ang dating plano, na binuo noong 2014, ay may kaparehong layunin, ngunit isang kamakailang pagsusuri ang nagpakitang ang mga kasalukuyang hakbang ay makakapigil lamang ng humigit-kumulang 20% ng mga inaasahang pagkamatay. Ang na-update na plano, na pinangunahan ng Central Disaster Management Council, ay nakatuon ngayon sa pagpapabilis ng mga hakbang sa loob ng susunod na 10 taon, kabilang ang pamumuhunan sa imprastruktura, pagpapalakas ng mga embankment, at pagsasanay sa mga lokal na komunidad.

“Mahalaga na ang gobyerno, mga munisipalidad, negosyo, at lipunang sibil ay kumilos nang magkakasama upang mailigtas ang pinakamaraming buhay hangga’t maaari,” pahayag ni Punong Ministro Shigeru Ishiba sa pagpupulong ng konseho.

Bilang bahagi ng bagong estratehiya, 16 pang munisipalidad ang idinagdag sa priority zone para sa mga hakbang sa pag-iwas, kaya’t umabot na sa 723 ang kabuuang bilang ng mga lungsod sa anim na prepektura. Nananatili rin ang layunin na bawasan sa kalahati ang bilang ng mga gusaling maaaring mawasak ng lindol o sunog, mula sa tinatayang 235,000.

Kasama rin sa plano ang pagtutulak sa lahat ng munisipalidad sa mga lugar na may mataas na panganib sa tsunami na magsagawa ng regular na evacuation drills bago matapos ang fiscal year 2030. Palalakasin din ang mga sea wall at evacuation towers, lalo na sa mga industriyal na lugar gaya ng mga petrochemical complexes.

Nagbabala si Propesor Norio Maki ng Disaster Prevention Research Institute ng Kyoto University na mas malapit na ngayon ang banta ng malaking lindol kaysa noong isang dekada.

Ang pinakamasamang senaryo na isinasaalang-alang ng mga awtoridad ay isang lindol na may lakas na magnitude 9 sa isang gabi ng taglamig, na may epicenter sa rehiyon ng Shizuoka, kung saan tinatayang mahigit 100,000 ang maaaring masawi.

Source / Larawan: Kyodo